ملي كانت تتكلم الحيوانات . كان السبع سيد الغابات . اترشحوا لقرودا للبرلمان . والذياب والثعالب فرشوا الطريق ببلعمان . جلسوا ساعات في القبة . شي يفلي لصاحبو شي يختارع لعبة . ناض قرد منهم صنديد . قال ليهم انرشحوا رئيس اجديد . قالو انرشحوه يكون نمرود . قالوا لخرين يكون قرد من لقرود . لقرودا كل يلغي بلغاه . وتركيت النمرود كلها واهواه . ابدات اللعبة تطوال واتكبر . وكلها فين تيتجبر . السبع كبرات في راسو ودار . قال ليهم هذا الشي عار . سكتات واتكمشات لقرود . اصبح كلها على كرسيه مشدود . قال ليهم السبع فين ممثل لقرود . ناض قرد ونمرود
. جات موكة وعرشات . وبالضحك اعليهم شبعات . الجرانة قرقرات واللفعة اتصفر . لحمار غير حمار بارك يشخر . الثعلب ابدى يدور في اعويناتو . وهو يعيط اعلى خياتو . الذيب قال للذياب اصحابو . اللي ما جابها بكراعو يجيبها بنيابو . كل حيوان جاب احبابو واشرافو . ولحمار ما داير حد في اكتافو . سلات اللمة وكلها فين امشى لحالو . لحمار باقي واحل في اكبالو . حتى اللي ادى شي اداه . فاق لحمار شاف الكلبة وراه . قال ليها مالكي على اللهيت والنبيح . قالت الكلبة يا لفصيح هذا الشطيح والرديح . هز قنوفتو للسما يهرنط ويغني . قالت ليه الكلبة هاد اللشي باش امعني . شوف ليك شي بردعة واشواري . وخلي ينقزواعليك الدراري . لبغل ولدك واكبر منك . وانت وجهك وضهرك ديما امحنك . ما تجلس مع اسباع . ما تتشاور مع اضباع . العام اللي جا يلقاك احمار . ديما تتمرغد في باب الدوار . الصغير يركب وينغز . لكبير ديما اعليك الثقل يهز . قال ليها اكلامك زين . وكون ما طول هاد الودنين . لدرت اللي ما يدار من اردود . ونقصي من الغابة اجميع لقرود . قالت ليه البرلمان فازوا به . انت اللي ديما النعاس غارق فيه . قالت ليه ابارك من الجحود . لخبيزة كاع اخداوها لقرود . ايه اشحال من اسبع طيح اسنانو . واشحال من حيوان غير الوانو . وانت يا لحمار ديما في الزريبة . امحسن وقاطعين ليك القزيبة . قال ليها لحمار انا مع الموضة . هذا الرازي ولكويبة نهضة ونوضة . قالت ليه سير اوى يهزو اعليك لحجر . انت غير احمار وبمشيك تتبندر .
.
الشاعر والزجال الزموري مصطفى امزيل
المعازيز في 21/11/2012
اقليم الخميسات المغرب
.
ليست هناك تعليقات:
إرسال تعليق